AMALIRA YA NYAMPINGA

Urakabona amalira y'umugabo
Ntukabone amalira y'umubyeyi
Umugabo ngo atemba ajya mu nda
Umubyeyi agatemba asohoka
Uko ashoka aliko atera agahinda.

Umubyeyi akwiye guhora asingizwa
Akibagizwa umuruho wamwokamye
Agashimirwa ibyiza azanira umuryango
Agatunga agatunganirwa
Icyo avuze ntikibe ni ay'abagore.

Iyo ubonye amalira y'umubyeyi
Asa n'amaraso atemba y'uruguma rwawe
Iyo utaruvuje vuba
Biratinda ejo rukaba umufunzo
Bugacya utakiva mu nzu.

Umubyeyi ni yubahirwe igihango
Abanywanye nibirinde kugitatira
Nibashyire imbere ibibahuza
Bamagane ibibatandukanya
Babivugutire umuravumba
Bawusome bacururuke.

Uteshutswe ku masezerano
Aya bagira ku manywa y'ihangu
Imbere y'Imana n'abantu
Bamaze iminsi bagisha imitima inama
Niyemere apfukame asabe imbabazi
Ntabe nibize ngarame.

Uko umubyeyi asohora amalira
Umutima usabikwa n'agahinda
Intero ikaba intimba ishengura umutima
Inyikilizo ikaba iya kimuntu
Ibikulikira murabizi.

Aya malira atemba asohoka
Ali n'atemba ajya imbere
Nituyalinde ikiremwa-muntu
Ntawavukiye kuyasohora
Arica akagira mubi.

Mubyeyi wese wayasohoye
Ndetse nawe uyasohora
Ntibagiwe nawe uzayasohora
Ndaguhojeje mbikuye k'umutima
Ngutura iki gihozo cya kibyeyi
Ngira ngo gihore kikubera ingabo

Ihorere mubyeyi mwiza
Ima amatwi amagambo akubabaza
Ishimane n'ibirezi bigushagaye
Wibitera agahinda ubabara
Tera umugongo iby'isi bikubabaza
Ushimishwa n'intimba yawe ashavuzwe niyo nsinzi.

Uli umubyeyi ntuli icyomanzi
Uri Rukundo nturi Rwango
Uri igicundiro cy'ubumwe n'urukundo
Uri gahuzamiryango
Uri inkingi mu muryango
Uri Rudasimburwa mu mwanya wawe.